إيــه الحيــــاة
إبراهيم حامد
إيه الحياة
هيه الحياة إنك تعيش
وقت الموات ..؟
هيه الحياة إنك تعيش
وقت انفلات البرج (م) الحمامات ..!
وقت انحراف الكلمة (م) المعنى
والبندقية (م) الرصاص اللي اتخنق جواك ..!
إيه الحياة ..؟
رغم اندهاش الطير من المشهد
كنت واقف في الميدان
بتنقش بالقلم فوق القمر
غصنين زتون
وحمامه بيضه (ف) وسطهم
فاتح في صدرك
بوابات للناس
واصل ما بين كل الجهات
فاتك إن القلب أوقات العواطف
ممكن يخدعك
كان سهل تعرف وقتها
إن البراح وموج البحر
ووشوش الغلابة الشقيانين
أشكال قديمة للحياة
كان سهل تعرف
إيه اللي خدهم من ملامحك
وانت مطبوع (ع) الوشوش
إيه اللي خلاهم هدوم متعلقة (ف) بحر الحياة
بيشدوا آخر نقطة (م) البحر اللي رايح للميدان
وينسوا يكملوا الرسمة
ويتوه ما بين الضحكة والدمعة
أطفال كتيره بيندهوك
جمد صوابعك (ع) القلم
وارسم هناك
مليون ملاك
ساعة الأدان راح يعشقوك
كان وقتها طالع " محمد جودة "
من بين الشطوط
بيقول هاتوه
دا اللي اترسم على كل وش وكل بيت
تعرف ساعتها إن أنا
حسيت برعشة قلمك الطافح
على أرض الميدان
كان نفسي أكتب كلمة الأحرار معاك
لكن بواقي الدم خلصت (م) القلوب
( صدقني كان لازم نموت )
وتموت صوابعك (ع) القلم
وتعيش خطوط الرسمه فوق المشنقة
وتمد إيدك من هناك
توصل هنا
وأنا وانت والمليون ملاك
وقفين حداد (ع) المشنقة
والرسمة طالعة للسما
والرسمة طاله ع الحياه
