ولا تموتى
مأمون كامل
وعيزانى أقول يا آمه
كما قبلى كتير ساءوا لكلمة يامه قالوها لك
وأنده من ورا قلبى وأقول يا حبيتى يا بلدى
وأحبك ليه
حبيبتى .. يعنى ساندانى
ولو ف الشدة سترانى
وأنا دمى اللى رخصته كتير علشان م يحميكى
رخص بيكى
صبح يتباع هنا وهناك كده ف النور وف الضلمه
عشان لقمه
وعيزانى أقول يامه
دروب الرزق مفتوحة وبحبوحة على الواسع
ورب الرزق
ما فرق ما بين عاصى وبين طايع
وقال اسعى
وأنا اللى سعيت
لغاية السعى ما استكفى
بقيت ماشى ف وسط الناس لا أنا شايف وباتكفى
بإيد ممدودة بشهادة عليها الختم والجودة
وإيد تانيه
بتتشمر وبتدور على رغيفها
ألاقيكى تحطى شروط
لا عاجبك ربنا يرحم
ولا عارفه طريق رحمه
وعيزانى أقول يامه
وأمى اللى بتتعبلى وتشقى كتير عشان أرتاح
ولو نبعد ، تعيش شوقنا
ولو ننزل ف بحر الكون تكون مجدافنا وشراعنا
وتحكم
فى ميزان قوتنا
بإيدها اللى ما تعرف ميل
ولا تخلى كبير فينا ولا صغير
يقول إزاى ولا اشمعنا
وأنا اللى عشت أحب الناس
كما كنتى توصينى
وقلت ألم وأجمع
ألاقيكى تقولى إرجع
بقيتى تخافى م اللمة
وعيزانى أقول يامه
نسيتى يوم ما قولتيلى ولا تخللى خضار عطشان
عشان خاطرك
رويت وردك وعليقك
لا قلت الورد كان أولى
ولا العليق مالوش لازمه
وآخرتها
بتسقينى جحود قلبك
دا أنا إبنك
أنا الشقيان
وعايش عمرى بأتمنى وبأستنى الفرج بكره
لا طول صبرى
ولا الحرمان بيشفعلى
ولا بكره سامعله آدان
يزيل الهم والغمه
وعيزانى أقول يامه
نسيتى إن أنتى قولتى زمان
ولا بيخاف من الكيال غير اللى كيله كان ناقص
أشوفك فى العيون ناقصه
يعز عليا نقصانك
وبتخافى لأيد على إيد تزود حرقة القرصة
دى قرصة جوع
بتقرص حتى فى الممنوع
تخلى العقل
ينسى الكل وكليله
ح يعمل إيه .. معاكى احتاس
لا عارف صبحه من ليله ولا شايفله فيكى خلاص
خلاص البطن بين قلبى وبين قلبك صبح مقطوع
وأنا اللى عشت ع الإخلاص
كما إنتى فطمتينى
وإنتى اللى نسيتينى
ماعاد همك غير إن عمرى ليكى يطول
وأفضل لابس العمة
وعيزانى أقول يامه
وحلةة انتى
وعشاقك كتير يتعدوا بالملايين
وانا عاشق
ترابك سر تكوينى
وزرعلك بهجة ف عيونى
ونيلك زاد شرايينى
وأنا عاشق
لبسمة نسمة صباحى بتحييكى وتحيينى
وهمسة ناعسة نعسانة تصحيينى
عيونها تقوللى يا راجلى
تعالى ارتاح فى بستانى
وشمسك هيَّ ضلتنا
وليلك نجمه سكتنا
بيهديها ويهدينى
وأنا عاشق
لكن يا عشق مش ناسى
ومين يقدر ينسينى هوان هجرك ونكرانك
وكنّة ايدى بالحسرة
وأنا اللى اديتك امبارح
وعايش يومى على شانك
وشايل لك أمل بكرة
وتدينى ما تدينى
ما بهتمش
وأنا اللى صبرت على جرحك ولميته
وجرحى لسه ما اتلمش
وطول عمرك كلامك فى رقبتى دين
وأنا سداد
تقوليلى تلف سنين ولا تخطى
أقول آمين
تقوللى خلى جوز أمك مكان عمك
أقول آمين
تقوللى طيع كبيرك يا بنى عميانى
أقول آمين
وأخرتها
وبعد العشق دا كله
فتحتى لغيرى أحضانك ، ويتمتينى ليه يامـه
نسيتى يوم ما كنا زمان أنا وانتى
بندفن سرنا وف بير
وكان كل اللى يتحداق ويتشادق
نسيبوه يقول
ونتغابى
ونقول فول
وكان بيصدق الغلبان
لكنه كان فى لحظة يلاقى مفسه مفيش
كأنه ما كان
نسيتى يوم ما قولتلى
أقوم وأرفع جيبنى لفوق لفوق
وصدقتك
وقلت خلاص ح ينسانى الضياع والظلم
وقوللتى يا مين ح يلحقنى ف سكة عيونى شيفاها وكانت حلم
أفوق
ألقى المصيبة فوق
وألاقى تحت متغيب
وحتى ف يوم ما كنتى زمان ما بين الأمهات الأم
وكل الناس تقول عنك
دا انتى اللى ومالك زى
وكان نفسى أصدقهم وتحمينى
ألاقينى
فى ليلة ويوم لا أنا اللى مات ولا اللى حـى
وألاقيكى
فتحتى ودانك الطاهرة
لمين قالوا
ومين زادوا
ومين صنف ف أولادك
ما بين آمنوا وبين حادوا
نستى طيب العشرة
وتاهت ريحة امبارح
وضاع من سكتى بكرة
وتاه الحلم ف الزحمة
وعيزانى أقول يا مـه
وعيزانى
وعيزانى
وعيزانى
ولا مرة سألتى إنت عايز أيه
تعالى نحط ما بينا حكم يعرف كتاب ربك
وهو يقولى ويقولك
تعالى نحط ما بينا حكم ولو كافر
ومش معقول على كفره كده بالظلم ح يجاهر
أنا عايز
وتفرق إيه ما بين عوزى وبين عوزك
أنا إنتى
أنا منك
وكل اللى أنا عايزه
أعيش وياكى يوم فى أمان
لغاية ما يحين موتى
ولاتموتى
ويبقى السطر ما بينا كتاب مفتوح
وأنا وإنتى
لا نرضى بظلم ولا عتمة
وساعتها
ح أقول يامه
